23-февралда таңкы саат 5:37де Тажикстанда күчү 7.3 баллга жеткен жер титиреди. Бул тууралуу чет элдик маалымат булактары жазды.
Силкинүү очогу Кытайдын Синьцзян-Уйгур автоном облусу менен чектешкен Тажикстандын Мургаб аймагында болгон. Жер титирөөнүн күчү Кытайда 7.2 баллга, Иранда 5.5 баллга, Өзбекстанда 3-4 баллга, Казакстанда 2-3 баллга жеткен.
Ал эми Кыргызстандын Алай районундагы Бор-Дөбө айылында 4.5 балл, Нура жана Эркештам айылдарында 4 баллдык жер титирөө катталган.
Тажикстандагы зилзала боюнча азырынча толук маалымат бериле элек. Кыргызстандын Өзгөчө кырдаалдар министрлиги кыйроолор жана жабыркагандар жок экенин кабарлады.