Жерлерди мыйзамдаштыруу жөнүндө мыйзам долбоору иштелип чыкты

Jeenalieva
By Jeenalieva Март 13, 2020 10:27

Жерлерди мыйзамдаштыруу жөнүндө мыйзам долбоору иштелип чыкты

2 2009-жылдан кийин сугат айдоо жерлеринде турак үйлөр салынып жана бөлүнүп кеткен жерлерди мыйзамдаштыруу жөнүндө мыйзам долбоору иштелип чыгып, Кыргыз Республикасынын өкмөтүнүн кароосуна киргизилди.  Бул тууралуу Кыргыз Республикасынын биринчи вице-премьер-министри Кубатбек Боронов Чүй облусунун Сокулук районундагы Ак-Ордо жаңы конушунун жашоочулары менен жолугушуу учурунда билдирди.

Жолугушууда биринчи вице-премьер-министр чогулган жергиликтүү элге Кыргыз Республикасынын президентинин жерлерди трансформациялоо маселелерин чечүү багытындагы тапшырмасын аткаруу максатында жер участокторун бир категориядан башкасына которуу (трансформациялоо) боюнча жүргүзүлүп жаткан иштер жөнүндө кеңири маалымат берди.

Белгиленгендей, өкмөт 2009-жылга чейинки сугат айдоо жерлеринде турак үйлөр салынып калган жерлерди мыйзамдаштырууну колдоп, 2018-жылдын 2-августунда мыйзам кабыл алынып, бүгүнкү күндө белгиленген тартипте жерлерди которуу процедуралары жүргүзүлүүдө.

«Айыл чарба министрлиги тарабынан 2009-жылдан кийин сугат жана айдоо жерлеринен берилип, турак үйлөр салынып калган жерлерди мыйзамдаштыруу жөнүндө мыйзам долбоору иштелип чыгып, Кыргыз Республикасынын өкмөтүнүн кароосуна киргизилди. Өкмөт социалдык абалды эске алуу менен бул мыйзам долбоорун колдойт жана Кыргыз Республикасынын Жогорку Кеңешине жиберет. Буга чейин маалымат алмашууда Жогорку Кеңештин Төрагасы жогорудагы мыйзам долбоорун колдой турганын билдирген», — деди биринчи вице-премьер-министр.

Жолугушуунун жүрүшүндө биринчи вице-премьер-министр Сокулук районунун акимине социалдык объекттерди куруу максатында Ак-Ордо конушундагы 18 га жер аянтын трансформациялоого даярдоо боюнча иш алып баруу тапшырмасын берди.

«Бүгүнкү күнгө чейин жер тилкесин мыйзамдаштыра албай келген жарандар бар. Ушундан улам алар үчүн тиешелүү жашоо шарттары толук кандуу түзүлбөй келген. Мектеп, бала бакча, бейтапкана, жол, таза суу сыяктуу бир катар социалдык жана инфраструктуралык маселелер орун алат. Өкмөттүн бүгүнкү чечими жарандарыбызга ошол шарттарды түзүп берүүнү өбөлгөлөйт», — деди Кубатбек Боронов жана ал жер участокторун трансформациялоо маселесин чечүүгө Өкмөт тарабынан өзгөчө көңүл бурулуп жатканын белгиледи.

Ошондой эле жолугушууга келген тургундар биринчи вице-премьер-министрге жана жергиликтүү бийлик өкүлдөрүнө суроолорун узатышып, жеринде жооп алышты. Кубатбек Боронов өз кезегинде жергиликтүү өз алдынча башкаруу органдарынын жетекчилигине коомдук унаа каттамдарын киргизүү маселесин караштырууну тапшырды.

Jeenalieva
By Jeenalieva Март 13, 2020 10:27

Приемная кампания 2018

Парламент

Элдик медицина