Ала качкан кызын бычактап, өзүнө кол салган каңкор…

Jeenalieva
By Jeenalieva Май 29, 2018 08:55

Ала качкан кызын бычактап, өзүнө кол салган каңкор…

7 29 жаштагы киши Чүй облусуна караштуу Жайыл районунун ички иштер бөлүмүндө ала качып алган кызын бычактап, кийин өзүнө да кол салган. Бул тууралуу ИИМден маалымдашты.

Билдирмеге ылайык, 27-май күнү, түнкү саат 22.00дө Бишкек шаарынын Биринчи Май райондук ички иштер башкармалыгына кызды ала качуу фактысы боюнча арыз келип түшкөн. Ага ылайык, Бишкектеги жана Чүйдөгү бардык райондук ички иштер бөлүмдөрүнө маалымат жиберилген.

«Бир нече убактан кийин Сосновка айылындагы өткөрмө бекеттен милиция кызматкерлери тарабынан Subaru Outback үлгүсүндөгү унаа токтотулган. Анын ичинде 29 жаштагы айдоочу, 20 жаштагы кыз жана 30 жаштагы дагы бир киши болгон. Алардын бардыгы Жайыл райондук ИИББге жеткирилген», — деп айтылат маалыматта.

Жайыл райондук ИИБге Чүй ОИИББдин кызматкерлери келип документтерди толтура баштаган. Бул учурда ала качууга дуушар болгон Т.Б. аттуу кыз кабылдама бөлмөсүндө отурган. Бир маалда Б.М. аттуу киши (ала качкан адам) кыз отурган бөлмөгө кирип, ичинен кулпулап алган.

«Бөлмөнүн ичинен ач кыйкырык чыкканда милиция кызматкерлери эшикти талкалап кирип, жерде канжалап жаткан кызды көрүшөт. Көрсө Б.М. аттуу киши аны бычактап, өзүнө дагы кол салган экен. Ошол замат Тез жардам кызматы чакырылып, экөө Жайыл райондук ооруканага жактырылган. Тилекке каршы, Жалал-Абад облусунан келип Бишкекте жашап жүргөн 20 жаштагы кыз алган жаракатынан улам көз жумду», — деп айтылат маалыматта.

Ал эми кылмышка шектелген 29 жаштагы таластык кишиге операция жасалып, учурда ооруканада. 30 жаштагы С.А. аттуу жүргүнчүсү Жайыл райондук ИИБдин тергөө кызматына өткөрүп берилди.

Аталган факты Жайыл райондук ИИББде каттоого алынып, Кылмыш жаза кодексинин 97-беренеси (адам өлтүрүү) боюнча кылмыш иши козголду. Ошондой эле кызматтык иликтөө дагы башталды.

Jeenalieva
By Jeenalieva Май 29, 2018 08:55

Парламент

Элдик медицина